في الليل... آخر ما كتبت

في الليل
بتفكر في الحكمة
في الفكرة
في الليل
بتفكر في الصاحب
في الأحباب
في الناس حواليك
في الحلم
قبل ما يفلت منك
امسك فيه بإيديك وسنانك
اتشعبط فيه

في الليل
بتغكر في الموت
واقف متخبي
قدامه ستار
مستني يقول لك: بخ
تتخض
تفرد دراعاتك ليه
من غير ما تحس
تاخده في حضتك
وتروح
وماترجعش

في الليل
بتفكر في الدنيا
قالوا: غرورة
مغرورة
قالوا: دي فانية
تيجي في ثانية
وتروح في أقل من الثانية
لكن دنيتنا
مش بس غرورة وفانية
لكن غدارة
وف عز ما هي حنونة
تلقى القسوة تكسر عضمك

في الليل
بتفكر في حاجات وحاجات
من كتر التفكير تلقاك تعبان
هلكان
فتحاول تهرب م التفكير
تلقاك
بتفكر في حاجات
لجل ما تهرب بيها
تتمنى دماغك تنسى
تسهى
بعد عذاب
ييجي الحل
فتصلي الفجر
وتنام