إيه ممكن تخاف منه
إيه ممكن تخاف منه
في يوم جات لي حنين بنتي
وسألتني
قالت لي: يا بابا إيه ممكن تخاف منه
سرحت بعيد
لقيتني باخاف من الضلمة
من العتمة
من الكلب اللي ينبح في حوارينا
من الغولة
من اللي رجله مسلوخة
مقشة ساحرة شريرة
مراة الأب في الحواديت
وحداية بتاكل عندنا الكتاكيت
وديب يعوي
لقيتني باخاف من الغربة
من الوحدة
من الحرمان
من الفرقة
من القسوة
من الأحزان
وهزتني إيدين بنتي بكل حنان
قالت لي: يا بابا إيه ممكن تخاف منه
بعزم ما فيّ قلت: الله
ماهو القاهر الجبار
وهو الغافر التواب
وعين بنتي
كانت عارفة إن أنا كداب
5 تعليقات:
إيه يا أحمد الكلام الجميل ده ؟الشعر عجبني ومش باعرف أقول كلام حلو كتير..
وبعدين هي حنين كده علاطول فاهماك..مش تخلي بالك شوية؟ :)
الله عليك
ايقاع لغة القصيدة حسسني بالخوف بجد
دي تاني مرة أقرا فيها القصيدة
والأولى كانت تقريبا في جريدة
طبعا هتستغرب من زيارتي
بالتوفيق وتشرفني في مدونتي
أنا بس حابه أقولك كل سنة وإنت طيب...أنا قريت قصيدة تانية لك في الدستور ولا تقل جمال عن القصيدة دي..
..وسلامي لحنين وكل الأسرة.
:)
جميلة اوي
حسيت بالخوف مع كلماتك و حروفك
تحياتي
أنا بس عايزة أقول إني بجد فرحانة إني اكتشفت مدونتك وزعلانة إنه اكتشاف متأخر قوي
كلماتك حلوة قوي
ربنا يخليلك حنين
إرسال تعليق
الاشتراك في تعليقات الرسالة [Atom]
<< الصفحة الرئيسية